Friday, December 07, 2007

The trutT


ازيك؟


الحمد الله تمام


ازيك؟


الحمد الله تمام


ازيك؟


الحمد الله كويسة


ازيك؟


الحمد الله


...


ازيك؟


مش كويسة... استريحت؟؟




Thursday, June 14, 2007

طرقات








حاجة الى البكاء, ارهاق, خوف, قلق, اضطراب, وحدة, احباط...لماذا لا نكتب و نحن سعداء؟ نحتاج دائما دافع مؤلم كي نلجأالى انفسنا و




نكتب .




Let's face it, if you are happy you'd be to busy enjoying the moment, you'd never stop to write what you feel. Even if you do, it'll never be as genuine as when you ache.






دواير و مفارق .. زقايق .. شوارع ضلمة و شوارع نور بنخاف من الاتنين .. بتلف و تدور و تجري و تهدي و تضحك و تضحك على نفسك و تقول انك خلاص بقيت واقف على رجليك.. و ترجع تحتاج تقف و تتكلم مع نفسك.. و تسند عاللي حواليك و تفضفض... تشوف انت كنت مين و بقيت مين و رايح على فين




مدونتي الحبيبة لسة محتجالك




عدنا




When blogging is the only way to feel home.






Tuesday, February 20, 2007

استهبال



لما بتشوف حاجة توجعلك عنيك بتغمضها
هو مينفعش الواحد يغمض قلبه؟

تاج

تاجك على راسي يا احمد باشا و يا محمد بيه
إيه اللي حيحصل لإيميلك لما تموت ؟؟
حيشوفله حد تاني. هو في أمان لايمالات اليومين دول
أديت الباسورد بتاعك لحد قبل كده ؟؟
لا
كانت علاقتك بيه إيه ؟؟
كان أختي :P
اأسمك ؟؟
ندى
أسم الدلع ؟؟
نكش و نودي و نادو و ندوش و نداشة و نادو و مشتقات كتير و اللي حيناديني بيهم حقله يا زلبنطح
عمرك ؟؟
19
بس انا الكبيرة
برجك ؟؟
العقرب
مجالك ومجال دراستك ؟؟
بدرس هندسة بس مش ناوية أشتغل فيها
نوع شخصيتك ؟؟
هي هي هيء هيء ( شتيمة)مبغيرش النوع
طبيعة مودك ؟؟
ما هو مود يعني حسب المود .. على العموم بقلب في قنوات كتير بس طبعي هادي هههههه طب خلاص خلاص خلينا في متقلب
بتعمل إيه في وقت فراغك ؟؟
بنزل اقعد مع الناس برسم بقرا بتفرج على افلام بدون .. حجات كتير
الأكلة المفضلة؟؟
الايس كريم الايس كريم الايس كريم انا عيلة قوي و ممكن تشتري سكوتي ببولة قهوة
الصفات اللي اخدتها من بابا وماما؟؟
من بابا العند و من ماما التسامح
السفر بالنسبة لك؟؟
فرصة لسة مجتليش اكتشاف عالم جديد و استمتاع ملوش حدود
ست حاجات باحبها؟؟
الصحبة الحلوة, الدفا,القهوة,الموسيقى,التمتع بالمذاق, التجديد في أي حاجة من وقت للتاني
ست حاجات بأكرهها؟؟
اليأس , الخيانة, القسوة,الفراق,التعصب,الغرور
الشغل بالنسبة لك إيه؟؟
تجربة لسة ماخضهاش .. عايزة اشتغل بقى... حد يشغلني ان شا الله ببلاش
الكومبيوتر والنت بالنسبة لك؟؟
ادمان
هييييييييييه خلصت اللي عايزه ياخده بقى السلام عليكم

Friday, January 05, 2007

everybody hurts sometimes

أتظن كلامك يجرحني ؟
أتظن الطعنة تذبحني ؟
أتظن دموعي قد سالت فيضان و بكيت الدهر و ما جفت محني ؟
حاول ما شئت ان تجرح قلبا مكسور
حاول ان تترك أثر الخنجر في عصبي المبتور
حاول ان تنبش انيابك في روحي
أن تحفر في عقلي ذكرى يوم سقوطي المأثور
ما عدت أبالي ... ما عدت أثور
ما عاد من الممكن أن أتألم
ما عدت أقاوم ... ما عدت أتكلم
ما عاد سمك يفنيني
ما عاد النقد يؤرقني
ما عاد المدح يواسيني
ما عاد صراخك يزعجني
فاستعذب ان شئت أنيني
قطع أشلائي .. مزق أوردتي
فدمائي جفت منذ عصور
حاول ما شئت لن تجرح قلبا مكسور

Thursday, November 30, 2006

تخاريف سكشن المساحة

تعلم انك تنمو بقلبي ...
و أن اهتمامك يستهويني ...
تعلم أن عيني تبحث عنك حتى تراك و فيك حتى تراني ...
أراني بعنيك نورك و في فمك ابتسامة ...
أرى ما أفعله بك ...
تذوب حولي فأقول أرأيت عبثي بما لطالما تحكمت به ...
و اذوب فيك فتقول أرأيتي كم تستمتعين بما كونتي من فوضى داخلي ...
و ان لم تكن انت من تلهو بي فلما أضيع بين كلماتك ؟
و ان لم أكن أنا من يلهو بك فلما تضيع كلماتك منك ؟
قد تكون لعبتك أو لعبتي ...
لكن كلانا يلعب للخسارة ...

Wednesday, November 22, 2006

متخفش



متخفش علية يا صاحبي
انا مش ورق
ولا حتحرق
و لا خايفة مالدنيا بحالها
و لا عاجزة المح يوم جمالها
ولا سايبة عمري يتسرق

متخفش مش كارهة الحياة
ولا في انتظار طوق النجاة
ولا بتوحد و لا بختفي
ولا حنكسر و لا حنتهي
ولا حنكتب عايشة على قيد الوفاة

متخفش صوتي لسة منسانيش
مش معنى اني بسكت سعات
اني خلاص مقدرش اغني
معرفش اعيش
ممكن اكون بتعب قوي
لما المطر ميودنيش
لكن جفاه ميبكنيش

مهما يكون الخوف كبير
حنقش جناحي من جراحي و اطير
متخفش

Tuesday, October 24, 2006

مقتطفات "قطف ملوخية " حدث بالفعل


أول قطفة
ك : ألو أيوة بنتي . فين المكان ؟
انا : اه ازيك يا باشا , ما تتصل بحد من العيال يوصفلك
ك : هو انا كل ما اتصل بحد يحدفني للتاني ليه ؟
انا : طيب خلاص .بونتوفينو . هو في الشاطبي عالبحر .
ك : فين الشاطبي دي ؟
انا : يا ابني عند بيت ش . دة احنا هناك كل يوم
ك : لا اوصفي عدل
انا : كليتنا بس من على البحر
ك : هي لها فرع عالبحر ؟
انا : متستعبطش
ك : والله ما فاهمك
انا : و انت من اامتى بتفهم يعني . فهمت ليه بنحدفك على بعض
ك : متلبخيش بقى . و اوصفي عدل
انا : طيب . عارف مسرح بيرم التونسي ؟
ك : هو مش مات ؟
انا : حيقفلوا المسرح يعني . متنرفزنيش
ك : لا مش عارفه
انا : ماشي . عارف السكرية ؟
ك : اه بتبقى في طقم الشاي
انا : لا يا رجل ؟ الكافيتريا يا مستفز
ك : لا
انا : يا ابني اللي كنا فيها اول امبارح . دة احنا فيها كل كام يوم
ك : ما انا مجتش يوميها
انا : هف بقى . مش لاقية حاجة
راكودا معروف بس بعيد قوي
ك : انتم ايه الاماكن الغريبة بتاعتكم دي
انا : يا لهوي . دة مشهور قوي
ك : هههه بتقوليها شبه حنان ترك في سارة
انا : منى زكي في كدة اوكيه
طب عارف فندق مكة او قاعة الاميرات ؟
ك : مش عارف الفندق حعرف القاعة اللي جواه . انتي زكية
انا : بيت ش عليه بوستر بوسي سمير
ك : اهههههههههه متقولي كدة من الصبح
انا : هو دة اللي انت عرفته
أعصابي
ضغطي
صحتي
القطفة التانية
انا : س , لما يجي ح متقولوش ان احنا رتبناله خروجة بكرة عشان عيد ميلاده
س : ليه انتم مش عازمينه ؟
القطفة الثالثة
ي : ندى انتي جاية الكلية بكرة ؟
انا : ايوة ان شاء الله
ي : و مش جاية ليه يعني ؟
انا : !!!!!!! نعم
ي : مخدتش بالي
ي : الساعة 11 كويس ؟
انا : ماشي يا باشا
ي : و وراكي ايه يا هانم ؟
القطفة الرابعة
سواق التاكسي : بص غباوة نسوان
الراكب : بس اللي سايق راجل مش ست
السواق : ما هما الرجالة اتعلموا الغباوة من النسوان
الراكب : بس انا لية اصحاب بنات بيسوقوا كويس قوي
السواق : لا . تلاقي عربياتهم هي اللي مساعداهم بس
القطفة الخامسة
س : ندى معكيش شاحن موبينيل ؟
انا : لا معايا فودافون
س : هاهاهاها قصدي نوكيا
القطفة السادسة
جالي فانوس لونه ازرق ورق جميل جدا بسطني قوي
م : لا لا متعيليش ارجوكي
انا : حالو يا حالو رمضان كريم يا حالو
ي : ندى الناس بتبصلنا باستحقار
ع : بس يا مجنونة اسكتي
م : يا بنتي اكبري بقى مش كدة حرام
انا : حالو يا حالو رمضان كريم يا حالو
الله الدنيا بتشتيييييييييييييي
م و هو بيعدي الشارع : انا معرفهش معرفهاش
انا : ماله العبيط دة طب بالذمة مين فينا اللي شكله مجنون؟
منعا للفضايح بلا ذكر أسماء
كفاية عليكم كدة كل سنة و انتم طيبين
انجي يا مصطفى رجعي البلوج لأرمي عليكي يمين الطلاق

-->