وشوش
وشوش الناس حكايات بتحكي تاريخ الكون . و أنا صغيرة كنت متعودة كل يوم و أنا راجعة من المدرسة , أركب جمب الشباك عشان أتفرج على الناس . اللي بيضحك و اللي بيكدب اللي بيشكي و اللي بيبكي اللي بيتخانق و اللي بيحب واللي و اللي واللي . كل واحد فينا له طريقة بيعبر بيها عن نفسه . و وشه هو المرايا اللي بينعكس فيها رد فعله حتى لما بيبقى عايز يخبي ممكن نبرة الصوت تكون بتبين أكتر بس مش الكل يقدر يحسها
الغريبة إني عمري ما حبيت الفرجة من الشباك كنت دايما بعتبرها تضييع وقت و نوع من أنواع السلبية . كنت و لا زلت بربطها بالشخصيات الضعيفة اللي بتحب الدنيا بس بتخاف تعيشها فبتكتفي بإنها تتفرج على الناس من فوق . عشان كدة بقولكم إن المسألة مسألة وشوش عشان من الشباك من فوق مش ممكن تلاحظ تعبيرات وش البني آدم لكن وسط الناس تقدر
ممكن أكون لغاية دلوقتي متأثرة بالموضوع دة . في العادي بأخد بالي من ردود أفعال اللي أعرفهم قبل ما حد يلاحظ . و ممكن أكون بتحكم في الطريقة اللي بتظهر فيها ردود أفعالي حسب أكتر من ناس كتير أعرفها . حاول مرة تنزل تشرب قهوتك في كافيتريا لوحدك منغير صحاب أو كتاب . حاول تتفرج على وشوش الناس . شوف حتلاحظ قد إيه من تصرفاتك و تحركاتك . شوف حتشوف نفسك في كام و حتعجبك نفسك ولا لأ
أصحابي عمرهم ما فهموا أنا ليه بحب أشرب قهوتي لوحدي(من غيرهم) في الكافيتريا . بصراحة مش دايما ببقى بعمل كدة سعات ببقى مجرد عايزة شوية هدوء عشان أفكر ... (بس مقدرش أقولهم كدة هاهاها مش مستغنية عن باقي عمري ) طولت عيكم كفاية كدة
في وشوش تشوفها ترتاحلها تشتاقلها.... يصعب عليك ترمش عنيك و إنت معاها و جمبها...وشوش في الزحمة تلقاها تتوه الزحمة وياها....ولو تشوف فرح في عيونها, تهدى جروحك و تصفى روحك....و يوم ما تحزن, يزيد همك و يسري السم في دمك....وشوش بتلمس كل قلب, منغيرها دنيتنا عذاب و بيها يحلى أي درب
posted by change destiny @ 1:22 AM
7 Comments:
الكلام بتاعك ده فكرنى بأغنية اعز الناس بتاعة عبد الحليم معرفش ليه.
ساعات بشوف ردود فعل غريبة جدا بين الناس وبعض ,رغم انى مبحبش أبحلق فى حد أو حد يبحلقلى(الا لوكانت بنوتة أمورة طبعا!!) لكن لما بكون قاعد لوحدى بحاول اراقب الناس المعديين بة المكان اللى انا قاعد فيه مثلا,وعلى من اغرب المشاهد اللى بشوفها لما يكون فيه بنتين جايين فى وش بعض مثلا ويقعدوايفصصوا فى بعض ,حاجة غريبة فعلا.
خلى باللك بقى لحسن حد من صحابك يكون بيقرا الكلام ده!
I hope you will never see faces like the one i've met in my life ....
fake facade's and facless people and back stabbers ... just a pure pain
nightlegend : i don't know why your words made me feel as if i stare at people , not look at them . Well , i don't ,do i ? =)
What do you mean by ويقعدوايفصصوا فى بعض ?
grayfox: Well i've seen my share of these kind of faces too . But i choose to forget them . Besides , Each face has it good and bad side . It's up to you to choose the angle you look at it from .
فى دوامه الحياه لسه بنقابل وشوش اللى صادق واللى خاين بين الحقيقه والتزييف
المهم ان الكلام اللى انت بتقوليه عن ان فى وشوش الناس بيبان حاجات كتير ممكن الحقد وممكن الكره وممكن الحب والطيبه وده خصوصا فى كلام العيون صح طبعا. بس الغريبه ان أكتر الانطباعات الاوليه اللى بتيجى عن طريق أنطباعات الوش بتختلف اووى ويمكن معايا انا حصلت كتير جدا .
أما فى موضوع أن الواحد لما بيتفرج على وشوش الناس من الشباك ده مالوش دعوه خالص بضعف الشخصيه اوة قوتها لأن ممكن يكون الانسان بيحب يشوف وشوش الناس ويفكر ممكن فى كذا حاجه ممكن فى نفسه وممكن فى اللى حوليه وممكن يتعلم من وشهم حاجه وغالبا بقى بيروحوا لموضوع تانى خالص ممكن يفكروا فى مشكله قديمه .
وأخيرا بقى انت كنت بتقعدى تشربى القهوه وتفكرى فى وشوش الناس وسيبانى اموت جنبك علشان أعرف مالك أو احاول أطلعك من اللى انت فيه طب كنت قولى وكنا نسيبك براحتك بس فعلا كان فى ناس ممكن يخلوك تكرهى نفسك
delpiero : أول مرة نتفق على حاجة , تصور؟ بس لو تلاحظ أنا لما كنت بقول إني بحب الفرجة من شباك العربية عشان في العربية تقدر تشوف الوشوش و مفيش حاجة تانية مفيدة تتعمل , لكن من الدور ال11 مش ممكن تشوف الوشوش بس ممكن تنزل تشوفها أو تعمل أي حاجة تانية .
المهم إيه الفرق بين إنطباعك الأول عني
و بين الحالي ؟ و للأحسن ولا الأسوأ؟
و للعلم الفترة اللي كنت بقعد فيها لوحدي أشرب قهوتي مكنتش للفرجة على وشوش الناس . كان جزء منها إعادة حسابات و الجزء التاني موضوع أقدم مما تتصور . بس قصدإيه و مين بناس ممكن يخلوك تكرهى نفسك؟
منتظرة إجاباتك
أنا مش أخد أنطباعات عنك انا كنت بتكلم بصفه عامه .
بس كويس انك أقتنعتى ان لما بنشوف وشوش الناس من الشباك ده لمجرد التسليه لأن مفيش حاجه مفيده تتعمل وده يؤكد عدم ربطه بضعف الشخصيه.
أما الناس اللى كانوا ممكن يخلوك تكرهى نفسك انا اقصد انك لو كنت قولتيه لى ولباقى المجموعه كنت ممكن تاخدى كم نقض فظيع ممكن يخليك تقولى يارتنى ....وده اساسا كلامك (بس مقدرش أقولهم كدة هاهاها مش مستغنية عن باقي عمري )
delpiero: أنا عارفة إنك كنت بتتكلم على العموم مش عني أو عن غيري بالذات . بس برده حسيت إن السؤال اللي أنا سألته طرح نفسه في دماغي . المهم , أنا قلتلك إني بتكلم على أصحابي اللي في شقة سبعة. اه و مين قالك إني إقتنعت و مين قالك إني ممكن أسيب أي نقد يخليني أكره نفسي ؟
Post a Comment
<< Home