تخاريف سكشن الجيولوجيا
لا أعلم متى كانت اللحظة ... لا أعلم حتى ان كانت مجرد لحظة .... تلك التي اختلط علي فيها كل شيء ..ثم اتضحت الرؤية ... لكني أعرف كيف
هالة من الضوء .....هكذا بدأ كوني .... تناثر على مدى بصري ... على مدى عمري ..توقف لوهلة ثم بدأ...فكانت النجوم و المجرات ...الشموس و الكويكبات ... الأرض و القمر ... فكنت أنت ... فكان عالمي .. عالم أنت شمسه لا لأنك تضيئه بل لأن كل ما به يدور حولك .. جاذبية من نوع آخر
لم يعرفوك من قالوا أن العشق يجعل المرء يقدر
فوجودك يجعلني لا أقدر
لا أقدر أن أميز حواسي حولك
لا أقدر أن أحجب الابتسامة عن وجهي حين أفكر بك
لا أقدر أن أتحسس سوى عطرك
لا أقدر أن أرى فيك خطأ أو سهو
لا أقدر أن أغفو و أنت في عيني
لا أقدر أن أصف ما أشعر به تجاهك
لا أقدر أن أتمنى سواك
أحيانا يراودني شعور بأني أريد أن أعيش فيك لا معك ... لم يعد يكفيني أن أشاركك الأوقات و الكلمات ... الهمسات و الضحكات .... أريد أن يسري دمي في قلبك ... أن أرى أحلامك ... أن أبكي دمعك ... أريد أن أختفي فيك ... أنا التي عشقت الوجود أريد أن أختفي فيك ... عشقت ضعفي أمامك و امتلاكك لحواسي و خضوع قلبي لك
لم يعد حبي لك احساس بل صار حاسة ...
posted by change destiny @ 5:31 AM
29 Comments:
يااااااااااااه .. كل ده كلام حلو و
مشاعر جميلة محوشاها.. و الله يا بخته ..
بس بصراحة أول مرة أشوف واحدة
بتحب سكشن ..:)1
التخاريف والاحلام هى احدى العوامل التى تساعد الانسان على الحياة لكن الاعتماد عليها تماما والانفصال عن الواقع يضر اكثر مما ينفع يجب الموازنة
تسلمى ومشكوووووووورة على البوست الرائع
ربنا يوفقك
الى الامام
أريد أن أعيش فيك لا معك ... لم يعد يكفيني أن أشاركك الأوقات و الكلمات ... الهمسات و الضحكات .... أريد أن يسري دمي في قلبك ... أن أرى أحلامك ... أن أبكي دمعك ... أريد أن أختفي فيك ... أنا التي عشقت الوجود أريد أن أختفي فيك ... عشقت ضعفي أمامك و امتلاكك لحواسي و خضوع قلبي لك لم يعد حبي لك احساس بل صار حاسة ...
.
روعة
علي فكرة ده كان سكشن عالي قوي واحلي حاجة عجباني ان الحب تحول لحاسة فعلا رائعة وعلي فكرة الفيلم كان (دومينو)
علي العموم كنت اعلم ما بداخلك
كنت اراهواضحا في نظراتك المتعاقبة
كنت احول الصمود .. امام ضعفك الجميل
لكنني بشر يا انسة
لذا فقد خارقت قواي
عندما تصارحيني بهذا
فماذا تنتظري من كي اقول
كل الكلام يهرب مني لا يجد مخرجا
لا اعرف ماذا اقول
اعددت كل الخطط كي ابدا انا بالحديث
لانك انتزعتي من الوقت وابتدأتي
علي الان ان اكمل الحكاية
لن اتوقف
سوف اكملها اذن
لك تحياتي وكل حب
لك شوقي نهر يصب
في الحنين
لك الحياة ولك السنين
لك الاماني والاغاني والابتسام
لك والورود والزهور والكلام
لك الحلاوة والجمال والصفاء
لك النجوم والشموس لك السماء
اسف تخيلت ان الكلام موجها لي وعلي اثر ذلك كان الرد
غصت في بحار الهوى
ابحث عنك
اسأل عنك كل الصدفات
اسأل عنك عروس البحر و الجنيات
اسال كل الموجات
علّها تدلنى عليك
تهديني اليك
فاسافر اليك
لأهديك
باقة ....
من الكلمات
الله على مشاعرك الجولوجيا
جميلة جدا قوي يا أدم
إنتى متأكدة انه كان سكشن جيولوجيا؟
:D
طيب فين السكشن في الموضوع :)
والله لو الجلوجيا بتخلي الكلام الحلو دة يطلع .. قولي لي اية الاوراق المطلوبة للإلتحاق بالكلية .. صورة البطاقة واية كمان
جميله....جميله جدا
بس الإحساس بإن عندك حاسه زى الحاسه دى
هل هيا حاجه تفرح انا شايف ان اٌنسان مش ناقص حاسه تانيه تقلب عليه مواجعه
و كفايه الآلام اللى بيلاقيها من حواسه
لو كان فيه حاسه اسمها الحب
فا دى هاتكون اصعب حاسه
شكرا يا صبرينا جدا
وانت يا مارك
لولا اني عارفك لا كنت قولت انها صدفه
لكن انا عارفك غيران
ابراهيم : قصدك ايه يا ابراهيم ؟ هو انا خرجت عن المنهج لا سمح الله ؟ دي حتى كلها طبقات الأرض
بعد الطوفان : يا سيدي ماله السكشن ؟ ما المحاضرات مالية البلد
و بعدين يا بخته ايه بس دة مامته دعت عليه ليلة القدر و باباه قال امين مع انه مش موجود أساسا
tamer : عندك حق بس مش كل الناس بتعرف توازن و مع ذلك الدنيا بتمشي أيا كان
sasha : أهلا بيكي .متفقة معاكي جدا بس هو مفيش طرف تاني أساسا . أنا كنت بس بحاول أثبت لنفسي اني حعرف أكتب عن حاجة أنا مش حساها . و بيني و بينك مفيش حد في الدنيا يستاهل انك تفني نفسك فيه و اللي يستاهل مش حيسيبك تعملي كدة حيحاول يعمل العكس و انتي برده مش حتسبيه
taher : ربنا يخليك . رافع معنوياتي دايما :)
مهندس مصري : باولو كويلو و بعشقه عمر خيرت و لا اختلاف عليه و فيلم بيعمل انقلاب لأي حد بيشوفوهsweet november
موكا في سيلنتروا و ما دام على حسابك تبقى أكيد حلوة . لكن ايه فيلم دومينو دة ؟
ادم :
أولا: لا داعي للاعتذار عن الخيال
ثانيا : حلوة
ثالثا : تحس ان اللي انت كتبته مش رد على اللي أنا كتبته لأن اللي كتبته من الواضح انه عن اتنين يعرفوا بعض من زمان و ممكن يكونوا متجوزين ( جديد طبعا) لكن اللي انت كتبته كان رد على اعتراف أولي بالحب
mark twain : جيولوجية ايه بقى دة انت خليتها فلك خالص . بس رقيقة جدا جدا جدا
sabrina : متفقة معاكي
m-elsewedy : بلاش احراج بقى
mfm : منور المدونة , بس منصحكش ؟. هندسة دي مقبرة للادمية
islam yousef : أولا شكرا
ثانيا حمد الله على السلامة
ثالثا تقدر تقولي انت لو خيروك حتستغنى عن أي حاسة . مع انك حتستغنى عن كل الألم اللي بتحسه بالحاسة دي . علميا البني ادم فينا بيتولد بحوالي 300 حاسة غير الخمسة المعروفين زي تحريك الأشياء عن بعد أو التخاطر . لكن عشان بيهملهم بيندثروا . بس ملاحظة زكية قوي
ادم : يا ابني غيرة ايه و بتاع ايه
مفيش منافسة في الابداع . مش مهم مين فينا اللي يتكلم . المهم ان الواحد يستمتع باللي بيقراه و يكتب اللي نفسه يكتبه
اتفوخس : شكرا يا فندم . بحب فيك ردودك الطوييييييييلة . شكلك كدة قصير متزعلش بهزر بهزر . مبسوطة انك هنا
شرفتوني كلكم ادعولي بقى عشان أنا عندي امتحان دلوقتي . حشرب الشاي و أنزل
دنيتي : دة واضح وضوح الشمس يا شيخة
دة مكان و زمان حدوث الحادث
ها عملتى ايه فى الامتحان اهم حاجة ؟
:D
sewedy : والله هو الحاجة الوحيدة اللي انا مش فاهمة هوايه علاقة المطاليب اللي في الأسئلة باللي احنا بناخده من أول السنة باللي أنا كتبته في ورقة الاجابة
لكن البحمد لله و شكرا على السؤال
جميلة وفى انتظار تخاريف سكاشن تانية
علي فكرة شوفي الوقت اللي يناسبك وياريت تقبلي دعوتي في سيلينترو علي موكا اما بالنسبة لفيلم دومينو ده فيلم سيء للغاية لانه كان من اختيار صديق لي لا يجيد اختيار الافلام بس انا مش عارف سمعت كلامه ليه
أنا أبويا كان جيولوجي بس أظن أنه عمر الالهام ما جاله وهو في السكشن
على العموم دي أول زيارة واتمنى تشريفي بالزيارة
ان يصبح الحب حاسه
ليست سادسه و لا سابعة
ليس لها رقم او اسم
ليس لها صفه او كيان مادى ملموس
جميل
اولا مين اللي قالك انهم يعرفوا بعض من زمان
لو سمحت اقري اللي انتي كاتباه تاني
هتلاقي انه ما فيش حاجة تقولك هما يعرفوا بعض من زمان
ولا لسة جداد
ثم غيرة او مش غيرة دي حاجة بيني وبين مارك توين وهو عارف كده كويس
ده سيم بينا
ماشي ؟
nightlegend : حمد الله على السلامة
و شكرا على زوقك
مهندس مصري : شكرا جزيلا . عارفة انها مش عزومة مراكبية
I'ved just read a preview about Domino . It's a true story in case you didn't know .
لمواطن المصري العبيط : امتحان الجيولوجيا بتاعي بكرة . و الالهام طاير خالص . نورت البلوج و يا رب دايما
شاطىء أخر : شكرا
ادم :
ههههههههههههه مش عارفة ليه حاسة انك ادايقت مع اني مش شايفة في كلامي أي حاجة تدايق . المهم حفترض انك مش متضايق و أكمل
أنا مقلتش ان الرد بتاعك وحش بالعكس أنا قلت انه حلو و دة كان رأيي
لكن لنفرض اني قلت انه وحش أساسا . ايه اللي يدايق في دة ؟ حيبقى مجرد رأي . و لا انت عايز الناس تنافقك و تصقفلك على كل اللي بتعمله حلو أو وحش
أنا ابتديت رأيي بكلمة تحس بمعنى ان دة احساسي أنا . ايه؟ محسش كمان ؟
مش المفروض أثبتلك انهم كانوا يعرفوا بعض من زمان لأني لما كتبت التخاريف كنت حاسة بكدة . دة مجرد احساس .. انت وصلك احساس تاني و كتبت حاجة تانية انت حر و أنا كمان حرة . فين المشكلة؟
و بعدين , أنا ايه عرفني بمدى معرفتك انت و مارك ببعض ؟ انت سبت عندي تعليق و الطبيعي اني ما دام رديت على التعليق اللي قبلك و اللي بعدك اني أرد عليك . و سؤال هو انت معترض على الكلمتين اللي قلتهم ؟ أنا مش شايفة فيهم حاجة غلط . أنا بعتبر الغيرة غباء . فين المشكلة ؟
و بعدين بقى يا باشا عشان نبقى واضحين مع بعض . أنا صريحة . و مش بعرف أكدب ( ما عدا يوم 1 ابريل و يوم 30 ابريل ) و مش بحب أميس . يعني مش حصقف لحاجة مش عجباني و و مش حوافقك منغير ما أبقى بجد مقتنعة . ماشي؟
انتي الكلمة الوحيدة اللي اي حد يقدر يقلها انتي بجد انسانه ,وع الارض معدشي ناس كتير نقدر نطلق عليهم كلمة انسان "احساس عالي قوي "
رفيق : كلنا بشر بس مش كلنا بنعترف بآدميتنا . شكرا و يا رب تزورني دايما
anosh : يا رب يخليكي للقمر . و أنا عمالة أقول هو شكله حلو قوي كدة ليه انهاردة
ماهى الجيولوجيا برضه بتتكلم عن الصخور اللى فى الارض والنجوم والكواكب والقمر...ويا عينى على القمر...سرحتى معاه ولا فيه؟؟بس مستحيل واقولها بثقه اكون شوفت كلام بالاحساس دا....قالوا الحب ضعف وقالوا لا قوه...اثبتيلى بكلامك انه اراده وانصهار....ما فيش اجمل من اريد ان اختفى فيك...عشقت ضعفى امامك وامتلاكك لحواسى وخضوع قلبى لك لم يعد حبى لك احساس بل صار حاسه
و هو أنا قد القمر عشان أسرح فيه؟
wow looks like there's someone falling for someone :P ...
happy to hear about that gush of feelings river :)
أحساس جميل مشاعر رقيقه موضوع جميل من أنسانه أجمل .
مشاعرك حلوه بس وسعت منك لو لواحد بنى أدام؟؟؟؟
مفيش فى الدنيا ملايكه بجد.
ممكن تردى وتعلقيلى على الجمله دى لا أقدر أن أرى فيك خطأ أو سهو
gray fox : look again ;)
delpiero :هههههه ... يعني انت سبت كل اللي وسع مني و مسكت في الخطأ و السهو ؟ يعني هو أنا مش بشم غيره :) ؟
أشرحلك يا سيدي
مش هما بيقولوا مراية الحب عامية
يعني انت بتبقى عارف و متأكد ان الكمال لله وحده و مع ذلك شايف البني ادم دة كامل . حتى لو كان مثلا شكله وحش بتبقى شايفه حلو مش مسألة ان الجمال نسبي أو ان دي أذواق أو وجهات نظر . لأ انت بتبقى شايفه كامل فعلا عنيك بتنقي الشوائب اللي فيه و انت بتبصله و بتبقى عارف انك غلط بس مش عارف تشوف الحقيقة . بتبقى مصدق وهمك
Post a Comment
<< Home