Monday, April 17, 2006

فليقتلني أحد


استيقظت البارحة في الصباح كعادتي ... توجهت الى غرفة المعيشة لأجد أمي جانب التلفاز .... قبلتها و قلت صباح الخير .... ثم ذهبت لغرفتي لأستعد للنزول ... تبعتني أمي الى غرفتي و سألتني اذا كنت سأذهب للكلية ... جاوبتها بالإيجاب ... قالت " طب خدي بالك من نفسك " ....كانت نبرتها مضطربة سألتها ماذا حدث .... فقالت "هاجموا أربع كنايس في اسكندرية ".... قلت الها ايه؟ ثم تذهبت لأتابع االنشرات الاخبارية انتابتني حالة من الألم الشديد .. أغلقت التلفاز و أغلقت غرفتي ... عادة لا أستهلك وقت كبير في التحكم بأعصابي و تدارك الموقف أيا كان ... لكن ليس تلك المرة كنت قد شارفت على البكاء لكني لم أبكي فلن ينفع هذا بشيء ...بعد قرابة الساعة و النصف أكملت ارتداء ملابسي و تحضير الكتب و اللوح .... و هممت بالنزول .... كان قد فاتني محاضرتين ... لكني كنت لا زلت مذهولة صامتة
لم أقطع التفكير طوال الطريق بعشاق الموت ... لماذا يرفضون انسانيتهم ... ... لماذا لا يتقبلون فكرة كوننا كلنا بشر و ليس من حقهم تنصيب نفسهم قضاة على البشرية ... ثم قررت ما سأفعل ... كنت قد قررت أن أذهب للأسرة التي أنا عضو بها و أقترح أن نجمع رواد الكلية من طلبة و مهندسين لدقيقة حداد و نذهب لتشييع الجنازة .. بالنسبة لي كانت تلك أكثر فكرة منطقية تراودني وقتها ... وصلت الكلية بعد حوالي ساعة أو أكثر .... كانت الطرق معظمها مغلقة بفرق أمن الدولة لأني أسكن على مقربة من مكان احدى الحوادث .... لم أذهب للمدرج علما مني بأن الدكتور لن يسمح لي بالدخول في تلك الساعة المتأخرة .... قابلني بعض الأصدقاء .....و لكي اختصر الكثير من الكلام ... اليكم بعض حوارات ذلك اليوم
ش : ايه يا بنتي انتي لسة جاية ولاايه ؟ ايه اللي مأخرك كدة ؟
أنا : الطريق كان زحمة . أصل أنا ساكنة في ميامي
ش : و فيها ايه ميامي ؟
أنا : الحادثة بتاعة امبارح كانت هناك
ش : حادثة , حادثة ايه ؟
أنا : هاجموا كذا كنيسة امبارح و قتلوا ناس
ش : أحسن ... هييييه ايه اللي حصل ؟
أنا : أحسن أحسن يعني ايه انتي مجنونة ؟ انتي ايه اللي انتي بتقولي ايه ؟
ش : و انتي زعلانة عليهم قوي كدة ليه يعني ؟
أنا : ناس من بلدي اتقتلت... دة ميزعلنيش .. ناس قاعدة في أمان الله بتصلي اتقلت ...دة ميزعلنيش ..انتم ايه مبتفهموش ما بتحسوش ... افرضي كان أخوكي أو أختك
ش : أيوة بس أنا أخويا مسلم و بعدين ما هما كمان غلطوا بس الخوف دلوقتي انهم ممكن يردوا علينا
أنا : هو دة كل اللي همك ؟ انهم يردوا علينا أو لأ . مش مهم نقتل بس المهم ما نتقتلش؟ و بعدين يعني ايه هما دي ؟ انتي خلاص قسمتي البلد نصين؟ولا انتي قصدك على الدنمارك ولا قصدك على المسرحية ولا قصدك على ايه ؟
ش : المسرحية ... مش هما برضه أهانوا الرسول
أنا : المسرحية بقالها كام سنة
ش : يا بنتي دي مفيش من كام شهر و على سديهات و فيديو و اتوزعت
أنا : لأ السيديهات هي اللي نزلت من كام شهر لكن المسرحية بقالها مدة ... انتي مش بتقري جرايد مجلات مبتشوفيش أخبار في أي حتة في الدنيا عشان حد يعرفك على الانتخابات اللي كان مترشح فيها و احد مسيحي ضد واحدمن الاخوان ... وبعد شرح مطول للحدوتة دي كمان
أنا : و بعدين روحي و روحك بإيد اللي خالقها . انتي غلطي أو أنا غلط بينا قاضي في الدنيا و بينا ربنا في الآخرة . مش نمشي نقتل في بعض
ش : سيبك من دة كله مش الكفار في الأول كانوا بيئذوا الرسول؟
أنا : كفااااااااار؟؟ انتي بتقولي ايه كفاار؟؟ و بعدين الرسول عليه الصلاة و السلام مش وصى بأقباط مصر . مش دة حديث مؤكد عن النبي
ش : ايه دة بجد ؟ أنا أول مرة أسمع عن الحديث دة
أنا : هو انتم بتسمعوا غير اللي بيقولوهلكم . و مش تسمعوه و تفكروا فيه لأ تعتبروه من المسلمات . و بعدين اذا كان الرسول وصانا نحترم الأديان التانية و نعامل أصحابها بالود و الرحمة يبقى نقتل . أنا كنت جاية انهاردة عايزة أقولكم تعالوا نروح العزا
ش : لأ متوسعش منك قوي كدة بقى
للحديث بقية لكن ذاك هو المضمون . كنت مقتنعة في بداية الحديث بأن ش شخصية شاذة . و لكن بعد أحاديث مماثلة مع بعض الطلبة و الطالبات و المهندسين
بالكلية . اكتشفت أنني أنا الحالة الشاذة . هل أنا منحازة لدين غير ديني؟ هل أنا متأمركة ؟ هل القتل طبيعي ؟ هل ذلك طبيعي؟
أنا مسلمة لكن ان كان من المفترض أن أقتل من خالف ديني أو خالفني الرأي . فأعتبروني مسيحية أو يهودية أو بوذية أو هندوسية أو بلا ديانة و ليقتلني أحد . أرجوكم ليقتلني أحد

45 Comments:

At 2:23 PM, Blogger Dido's^^^ said...

متفقة معاك تماماً .. واجهت مناقشات مماثلة مع بعض الأصدقاء و اكتشفت إن أنا بامثل الحالة الشاذة مش همة

ربنا يستر عليك يا مصر

 
At 3:02 PM, Blogger free soul said...

روحي و روحك بإيد اللي خالقها . انتي غلطي أو أنا غلط بينا قاضي في الدنيا و بينا ربنا في الآخرة

كلامك جميل و للأسف صحيح...

انتى عاقلة لحد الجنون فى زمن صار فيه العقل جنون!!

 
At 4:22 PM, Anonymous MeMo said...

دا جهل ازلى منتشر فى كل طبقات المجتمع
و له حل لن احنا نفهمهم
ان احنا اما نسمع شيخ اجهل من البقرة بيخطب فى الجمعة بقتل كل ما هو غير انسانى منيبش الجامع و نمشى لأ نقوم نرد عليه
الحل فى ترك السلبية
و نفهم الناس

 
At 5:33 PM, Anonymous ikhnaton2 said...

شكراً لجرائتك فى سرد الأحداث وبالأكثر فى الدفاع عن حق الانسان أن يعيش أمام زميلاتك، وخدى بالك من نفسك ومتتجنينيش أكثر من كده.

 
At 9:12 PM, Blogger مهندس مصري said...

بصي رايي لو سمحتي اقري في البلوج بتاعي

 
At 9:33 PM, Blogger إ بـ ر ا هـ يـ م said...

للاسف يا ندي فيه ناس كتير زي شين مش فاهمين حاجات كتير تزيد عن 100 حاجه مثلا

احترام الاسلام للاديان الاخري
الخلفيه التاريخيه لاقباط مصر في الاسلام من ايام المقوقس
احترام المواطن لاخيه المواطن بغض النظر عن انتمائته
احترام دور العباده

الخ .. الخ

 
At 11:29 PM, Anonymous Anonymous said...

انت المسلمة الحقيقية وهم همج لايدرون انهم اداة مسخرة لخدمة أعداء بلادهم . هل يريدون ان تتحول مصر الى عراق أخرى؟ الاسلام هو اول دين اعترف بالديانات الأخرى وسمى المؤمنين بها" أهل كتاب" وكانت هذه نقطة تحول حاسمة فى تاريخ البشرية. اسلام هؤلاء اسلام ظلامى مشوه يطابق الصورة المشوهة التى يصنعها اعداؤنا لنا. علينا ان نرفع جميعا اصواتنا ضد التعصب والهمجية

 
At 11:34 PM, Blogger Ø²Ø¨Ø§Ø¯ÙŠ said...

بصراحة احنا مش عارفين البلد دي رايحة لفين وأية اللي بيحصل بالذات اسكندرية .. دا احنا كنا عايشين في سلام ومحبة مع الأجانب من الجلريج والطلاينة والمسيحيين كمان أنا نص ذكرياتي الجميلة أبطالها مسيحيين وما كانش علي ايامنا مسلم ومسيحي كنا كلنا شباب بايظ وبس.. كنا ناكل عند بعض وننام عند بعض ونذاكر مع بعض وننجح أو نسقط مع بعض والله كنا واحنا صغيرين بناخد العيدية من جيراننا المسيحيين وكنا نحضر افراحهم في الكنايس .. اية اللي بيحصل دة الأن أنا مش عارف

 
At 12:42 AM, Blogger The Eyewitness said...

شكراً يا Logical Nonsence
انا فعلاً مبسوط من آلي انت كتبتيه. عارفة ليه لأني عارف أن الأغلبية بتفكر ذي زميلتك آلي كانت بتكلمك وأول مرة أحس ان ممكن يكون فيه لسه ناس بتاخد موقف حقيقي فيه حب وأخلاص وأيمان ومش بغرض النفاق أو الأحراج من زملائه المسيحين، ولو أن كمان ده معدش فيه حد بيتكسف ولا يبحج حتى. شكراً على كل حاجة.

 
At 4:17 AM, Blogger change destiny said...

dido's : ما دام أنا و انتي اتفقنا . نبقى مش حالة شاذة نبقى حالات شاذة . و حالات شاذة على حالات شاذة ممكن في يوم نخلي حالتنا أغلبية و التعصب حالة شاذة

free soul : بقالي مدة محستش ان روحي حرة ... احساس غريب باني خلاص عجزت

memo : مع ان كلامك صح لكن مبقاش كفاية كل واحد فينا يتكلم لوحده . احنا محتاجين نكون جبهة . نعمل مكاتب محتاجين ننزل الشوارع مع بعض محتاجين نعلي صوتنا

ikhnaton2 : العفو . بس أنا اللي يعرفوني بطلوا يقولولي متتجننيش بقوا يقلولي اتجنني بس متتمسكيش أمن دولة

مهندس مصري : علم و ينفذ

ابراهيم : و الناس دي في ناس لاعبة في عقلها و واجبنا ان احنا نعالجهم

anonymous : بينرفزني فكرة كوننا شوفنا لعبة فرق تسد دي ستين ألف مرة في بلدنا و شايفينها مليون مرة في بلاد اتدمرت و مع ذلك بندلق زي الجرادل


زبادي : تعرف ان دة جزء كبير من المشكلة . ان الجيل الحالي مفصول . يعني أنا سألت واحد من اللي كلمتهم يومها انت عمر ك ما دخلت كنيسة أو كان لك صاحب مسيحي ؟ قالي لأ طبعا . أكيد متصور ان أي حد مش مسلم يبقى اسرائيل . ما هو من و هو طول شبرين أي حاجة غلط بتحصل في الدنيا بيقولوله السبب اسرائيل

the eyewitness : أشكرك ... بيتهيألي ان احنا محتاجين نؤمن بان الصح موجود عشان نشوفه . أصل أنا لما كتبت البوست دة كنت في حالة اكتئاب . أينعم حالة الاكتئاب لسة موجودة لكن أقدر أقولك دلوقتي اني قادرة أشوف أحسن . أنا مش حالة شاذة . الصح موجود لكن من كتر ما الغلط مؤلم احنا مش قادرين نشوف الصح . لكن عشان الصح يغلب الغلط لازم نؤمن بيه و ساعتها حتى لو مش موجود قوة ايماننا بيه هتزرعه . مجتمعنا بقى كله نفاق و غش عشان كدة لازم نتكلم بصراحة و نتناقش و نفكر . لو عايزين مصر تتغير يبقى لازم منفقدش الأمل

 
At 6:55 AM, Anonymous Anonymous said...

i would recommend spending sometime reading the comments in the following site:

www.copts-united.com

this will explain to you how zakaria bokloz is not the only one who is writing junk about the religion of Islam.
The majority of the copts share his views, and has nothing but safalah and wasakha to say about their fellow muslims in Egypt.
Just follow it for sometime and see if Zakaria bokloz does not seem to be a tolerant huy compare the average copt

 
At 9:40 AM, Blogger African Doctor said...

ما كتبتيه يعيد الرجاء في إمكانية الحل
طالما هناك ناس تستاء مما حدث و تنشر هذا في محيطها
أشكرك على إعطائي رجاءً

 
At 12:24 PM, Blogger عشقك ندي said...

أنت فعلا حالة شاذة لأن الفهم بي حالة شاذة في مجنمع جاهل والتسامح بقي حالة شاذة في مجتمع التعصب الأعمي والجمال بقي حالة شاذة في وسط كل هذا القبح الذي نعيشه لكنه قدرك يا مغّيرة الأقدار عساك تفلحين يوما

 
At 2:53 PM, Anonymous MeMo said...

الاخ انونويموس
ليه اجنا على طول بنبص عاى الغير من غير ا ننتقد انفسنا
نفسى مره اقول لحد حاجة عملناها غلط من غير ما يقوللى ما هما عملوا كذا
و نتكلم بصراحة بقى
الناس فى الموقع ده ببيتكلموا
كلام مش صح اه
وحش اه
لكن ما راحوش قتلوا حد و هو بيصلى
و مدافعوش عن قاتل
فاهمنى يا كتكوت

 
At 3:40 PM, Blogger yousra said...

anonymous :u can go to ISLAM ON LINE TO SEE THE REAL HATRED THAT THE MINORITY OF COPTS IS RECIEVING FROM THE MAJORITY OF MUSLIMS SO DONT BLAME THEM BECAUSE THEY ONLY REFLECT THE PICTURE OF THEIR SOCIETY
HOPE THAT U UNDERSTAND

 
At 9:17 PM, Blogger ادم المصري said...

التهام من بعض الاصدقاء شيء وارد

مهما كان فظاعة هذا الاتهام .. فهم بعض الزملاء .. عزرهم الوحيد .. انهم لم يلموا بكل جوانب شخصيتك

عزرهم الاخر انهم لم يتلقوا نفس ثقافتك
قد نجد عزرا اخر .. في انهم لم يتلقوا نفس تربيتك

قد تجدي كل من حولك يفكر بهذا الاسلوب
قد تجدي نفسك وحيدة في هذا العالم المليء بالبشر

قد تجدي نفسك وبعض قضاء اجمل ايام العمر في هذا التعليم الخرب انك بلا اصدقاء

ولكن الفاجعة التي قد لا تتحمليها عندما يأتي الاتهام من اقربوكي

من الذين تعتبريهم اقرب لكي من حبل الوريد

من الذين تعتبريهم سبب وجودك في الحياة

من والدتك .. امك .. مامتك

لما تقولك كده بعد مناقشة ماتعرفش تاخد فيها لا حق ولا باطل

انت ما بقتشي مسلم .. احسن لك تروح كنيسة وتغير دينك عشان تريحنا وتستريح

تخيلي كده يكون احساسك ايه
مهما عصرت في نفسك
عمرك ما هتمري بالاحساس اللي انا مريت بيه

 
At 9:48 PM, Blogger little sesame said...

يا سلام

 
At 12:15 AM, Blogger ...دنيتي said...

طبعا انا معاكي في كل اللي بتقوليه وانا عن نفسي اعتذرت لكل اصدقائي المسيحين اللي ملهمش اصلا علاقة باللي حصل لأني من القاهرة
وطبعا الناس اللي عملوا المشاكل دي لا متدينين ولا بيغيروا على دينهم ولا كل البطيخ ده دي ناس جهلة ومبتفهمش

 
At 6:20 AM, Blogger Bent El Neel said...

Thank you for being a sane reasonable voice in a time where nobody wants to use the brains God gave them.

God bless you and save Egypt from this evil.

 
At 3:36 PM, Anonymous Anonymous said...

صحيح انا وانتي واغلب المعلقين شواذ في هذا المجتمع..
المشكلة هنا هي الجهل والجهل الشديد جدا..وكون المرء طبيب او مهندس لا ينفي هذا الجهل...
الناس اصبح كل ما تعرفه هو كام كلمة من هذا الشيخ او ذاك.. ويا ريتهم حتى تعلموا الدين فعلا على حقيقته.. كل ما تعلموه هو الحجاب والدقن وان الآخرين كفار يجب قتلهم..

والله يستر على البلد..

 
At 10:28 PM, Blogger tamer said...

فعلاا عزيزتى اتفق معاكى واشارك الحزن على وصل الية حال البلد

اولاا واخير كلنا مصرين يجب ان نكون يد واحدة ضد اعداء الوطن لكن لااسف تكون ايدى خفية تحاول اشعال فتيل الفتنة بين المسلمسن والمسحين

يريدون اشعال البلد نار لانهم مستفدين هذا

والمفروض الشباب يكون عندة وعى ومعرفة بكل الاخطار اللى بتحوم حوالين البلد مش يشمت البعض فى مصائب الاخرين والاسف نسى انهم مصرين مثلة

اتمنى من الله اصلاح الحال وان يحمى مصر من شر الفتن


ربنا يوفقك

الى الامام

 
At 12:46 AM, Blogger islam yousef said...

للأسف كل كلامك صح
احنا عايشين فى عالم جاهل
الدين او اتلفهم الخاطىء للدين ولد التعصب
النزعه الإنسانيه ماعتش فيه اللى يناصرها
أنا مش لاقى واحد يقول
الإنسان أخو الإنسان مهما كانت الفروق
أو الديانات
احنا فى الآخر بنمثل الانسان

 
At 10:37 PM, Blogger Ahmed Shokeir said...

المشكلة الحقيقة ان طريقة تفكير الانسة شين هيا طريقة تفكير كتير اوي من الناس بالرغم من انها فتاة جامعية المفروض انها مثقفة
فعلا الثقافة شيئ مهم جدا يوسع المدارك ويخلي الانسان يقدر يقيم المور بشكل تحليلي سليم

يلعن ابو الجهل

 
At 2:44 AM, Blogger Taher said...

يا جماعة ياريت الناس تتأكد
وخاصة الاخوة الأقباط
ان دا مش من تعاليم الاسلام فى شئ

وزى ما قال استاذ احمد


يلعن ابو الجهل

 
At 6:07 PM, Blogger ادم المصري said...

ارجوكي تأكدي .. اني لست بهذا الغباء

 
At 9:34 PM, Blogger مداح القمر said...

بداية بلدنا بتمر بلحظات حرجه جدا وحلها فى ايدنا احنا الشباب....عايز اقول خلينا ننسى المسرحيه وننسى المواضيع اللى السبب فى اثارتها مش مصريين...اكيد مش مصريين...وعارفين كلنا انها يد خارجيه
عايز اقول كمان ان اعز واقرب اصحابى مسيحى...بتغدى معاه وهو يتعشى معايا...اسهر معاه وهو ينام معايا...ودى حقيقه وطول عمرنا اصدقاء.حصل من اربع ايام اتنين اصحابى واحد مسلم والتانى مسيحى
المسيحى قال للمسلم تعرف يا احمد؟؟ لو احنا الاتنين اعداء فى حرب وشوفتك ادامى مش ح اقتلك...رد احمد وقال يا صمويل انا مش ح ادخل الحرب دى
بلاش نشوف بعض ونكشر فى وش بعض....بلاش نكبر الموضوع وننساه قوام مع ان دا مش حل بس اهو مجرد نفخه فى نار بيحاولوا يقيدوها

 
At 5:06 AM, Blogger change destiny said...

anonymous : I'd like to ask you a question . What makes you a muslim ? Because i think the answer is because you were born one . So if you were born of any other religion you would have probably believed in it . قال تعالى:(ادع إلى سبيل ربك بالحكمة والموعظة الحسنة وجادلهم بالتي هي أحسن) .(النحل:125).
You as a muslim are supposed to be a good example because the prophet ( pbuhs ) is dead . And you are how the world visualizes Islam . And that goes for any other religion . الدين معاملة
What's on some sites said my some christiansd is wrong and what's on some sites said by some muslims is wrong . They both create hate and noone could possibly know who started this mess . But nothing justifies murdering an innocent human beingقال رسول الله ( ص ) : من قتل ذميا فأنا خصمه ومن كنت خصمه خصمته يوم القيامة ) وفي رواية ( من اذى ذميا فانه خصمه .. )

african doctor : أشكرك . الاعتدال موجود لكن مش حيعيش لو محدش دافع عنه


عشقك ندى : أؤمن بأني ان آمنت بكوني قد أفلح فسيتعثر القدر و يتغير و سأفلح .... بس قول يا رب

memo : حتى لو وجهة نظرك صح مية في المية . مفتكرش كونك تقول للشخصية اللي انت بتقنعها يا كتكوت حيعمل أي حاجة غير انه يخليها تنفعل . مجرد نصيحة صدقني مش قصدي حاجة . اطرح وجهة نظرك بأسلوب اللي قدامك مش بأسلوبك

yousra : if you want anybody to understand you , then please start being a little bit more positive . try to believe in the right thing more . Because there are racists everywhere and there are anti-racisits everywhere .

adamelmasry : معلش يا باشا ربنا معاك . بس متجزمش بكون محدش حس الاحساس دة قبل كدة أو على الأقل بكوني محستهوش قبل كدة

little sesame : كونك مش شايفة ناس من اللي أنا اتكلمت معاهم ميلغيش وجودهم . علمي المسلمين الأول ينفذوا كلام دينهم بعدين حاكمي غيرهم
قال الله تعالى: (لا ينهاكم الله عن الذين لم يقاتلوكم في الدين ولم يخرجوكم من دياركم أن تبروهم وتقسطوا إليهم) (سورة الممتحنة


دنيتي : بس هما مش عارفين انهم جهلة واجبك و واجبي نحاول نفهمهم الحقيقة

bent elneel : God bless you too . But i have never been called reasonable before .

anonymous : برضه مش من حقك انك تتريق عليهم ناس مقتنعة بالدقن و الحجاب حاجة تخصهم . كل اللي بنقوله التعدي على حريات الغير غلط . لكن مع الناس دي بالذات التريقة أو حتى النقد على أسلوبهم بيهيجهم
واحدة واحدة عشان يسمعونا

tamer : ربنا يوفقك وتنشر السلام

islam yousef : موجودين لكن بعاد عن بعض و مخنوقين لدرجة انهم اتعودوا يسكتم محتاجين أمل عشان يغيروا البلد بس هما يقدروا يغيروا البلد

ahmed shokeir : الفكر دة أساسا مقره الجامعات و المدارس . حصص التربية الدينية اللي بيناقش فيها المدرسين الكتب اللي هما عايزينها

taher : ياااااااااا رب

adam elmasry : أرجو ذلك

mr lonely : ايد على ايد تساعد صوت على صوت نغني
بس معتقدش انها ايد خارجية بس في كمان أيادي داخلية عاشقة للسلطة

 
At 6:20 PM, Blogger karakib said...

يء مخيف انتشار ثقافه عدم قبول الاخر او بمعني اخر الجهل الشديد بالاخر
سيد الكره هو الجهل
جميله حركه مصالحه و مشاركه اللي قام بيها المدونون المصريون
انتوك

 
At 11:35 PM, Blogger مهندس مصري said...

مش عارف لبه قرات الموضوع ده اكثرمن 20 مرة

 
At 10:32 AM, Blogger هوميروس said...

هما اللي انتي كنتي بتتكلمي معاهم دول تبع جماعة محظورة ولا ايه
المهم ان اللي حصل زعلنا كلنا علي فكرة كتير من اصحابي مسيحيين

 
At 5:31 PM, Blogger Ayyam said...

"فليقتلني أحد"

Change destiney!
I would rather say God bless you and long live people like you...
Wonderful post, I love it...

 
At 7:48 PM, Blogger لا أحد said...

انا اري ما حدث ليس له سبب ديني بقدر ما هو ينبع من مشكلة اجتماعية محتنقة و موجودة تظهر للسطح احيانا وتختفي احيانا , تتحرك بأيد خفية تعمل ضد مصلحة هذا البلد
اظن انني انت قراتي البوست اللي كاتبه جار القمر المدون السكندري وشاهد عيان علي الاحداث بجد حاجة تحوف http://jarelkamar.manalaa.net/node/277
دعونا قليلا نقرأ الخطب السياسي منذ اقل منشهر تحركت الحركة الوطنية للتغير والاخوان المسلمين في نفس الوقت ( نعتبرها صدفة زمنية ) ضد قانون الطواريء بدأوا بنشر ملصقات في الشوارع
الدول العربية جميعا تقسم العراق والسودان ويمكن الدور علي مصر
اعترف بعنف طائفي وبعقلية غابة في كلا الطرفين مسلم ومسيحي ولكن يظل السؤال لماذا وبعد كل هذه السنين تظهر مثل هذه الاحداث من المستفيد
عزيزتي لنعلم جميعا ان هناك من هو أو هم علي استعداد ان يبيعوا مصر شعبا وارضا وثقافة من اجل المال أو الكرسي
ليس الدين هو السب ولا المحرك لذلك والدليل من يقوم بهذه الاحداث هم بلطجية يشبهون لحد كبير بلطجية يوم الاستفتاء والانتخابات غريبة دي صح ؟؟

 
At 10:59 PM, Blogger ادم المصري said...

http://et7ad-modwnin.blogspot.com/


ياريت نزوري الاتحاد

 
At 4:23 AM, Blogger change destiny said...

أنتوك : حركة جميلة لأنها حركة ايجابية

مهندس مصري : جه في دماغي احتمالات كتير قوي منها عشان مش قادر تصدق أو مش عايز تصدق أو بتدرس العقلية اللي بتفكر بيها شين أو بتدرس عقليتي أو بتفكر البلد رايحة فين أو فاضي أو عشان أنا مكتبتش حاجة جديدة و انت مستخسر تطلع من الصفحة منغير ما تقرا حاجة أو مهتم بمعالجة الفكر دة أو تفجيرات سينا مكنتش لسة حصلت أو أو أو ..... أقولك حاجة ولا أنا كمان عارفة

هوميروس : كنت فاكرة كدة لغاية السنة اللي فاتت . اكتشفت ان الفكر دة بقى يعب عن ناس عادية مش متطرفين بس
ayyam : God bless you too . But , I actually don't like that post at all . I really failed to see the brighter side when i was writing it , which is not a habit of mine .

Ahmed hassan : أولا : تحليل أحييك عليه . و متفقة معاك فيه . ثانيا : بس عشان أقنع الآنسة ش بيه صعب . لأنها شايفة ان المسألة مسألة عقيدة و دي مسألة حساسة عند المصريين من أيام الفراعنة . يبقى لازم أكسر ايمانها بالكلام دة بمقايسها هي و هي في الحالة دي الدين . يعني لازم اقنعها ان دينيا دة غلط قبل ما أكلمها في السياسة و ليه و مين
بس صح و شكرا على اللينك

adam elmasry : لية الشرف

 
At 4:13 PM, Blogger Mohajer Masry said...

You are perfectly right and I disagree with many of the posting, you are not in the minority. You are like many on the silent majority camp.

I was one of these silent majorities, but I feel like I have to come out and defend Egypt as well as Islam. Both are hijacked by fanaticism.

Good luck, keep talking.

Regards,
http://mohajermasry.blogspot.com/

 
At 4:02 AM, Blogger change destiny said...

mohajer masry : well i hope you talk and talk and talk untill the whole world knows the truth

 
At 7:30 AM, Blogger aolaaol said...

منافقين مخادعين وبنكدب على نفسنا كتيير
كل مصيبة تحصل بعيد عن الواحد ينام ويأنتخ ويستريح ويبقى آخر تمام لكن لو لمسته هو يبقى مش تمام مثلا لو حد لا قدر الله سقط فى مادة او ما جابش تقدير تلاقى اللى حواليه ناس فى منتهى الأيمان والرضا ده بالطبع لأنهم بعيد عن الأذى ويظهر التسامح فى قلوبهم وقدر الله ما شاء فعل انت مش مؤمن ولا إيه؟ ويوم ما هما حد منهم يحصلوا حاجه بيبقى الواحد منهم عايز يولع فى الدنيا زيهم زى كتير بعد احداث إسكندرية مسلم؟يبقى قشطة ولا يهمك ده مسيحى اللى مات انت مالك ,يلا يولع المهم انت فيك
حاجة يا حبيبى ؟؟؟
زيهم زى ش دى تخيلى لو كان ده حصل للمسلمين ,الناس اللى زى دى معندهاش موضوعية وبدافع عن شىء هلامى هى مش عارفه اصلا, ماهى لو عارفه حاجة عن الإسلام كان رد فعلها حيكون مختلف تماما,وفيه انصاف ومعقولية...اسمحيلى اشكرك لأنك فكرتينى بخاطرة كنت كتبتها, قمت بتعديلها ونشرها فى مدونتى وبأدينلك بالفضل فى انك فكرتينى بيها

 
At 12:11 PM, Anonymous delpieroo said...

. مش ممكن!لأ مش معقول أزاى لسه فى حد فى مصر بيفكر أن فى فرق فى التعامل بين مسلم ومسيحى وحتى يهودى فى التعامل والحقوق والواجبات والفرق الوحيد هو فى معتقدات كل منهم وطريقه أداء المراسم الدينيه.
اللى حصل ده من ناس متتطرفين لا ينتموا للأسلام ولا حتى المسيحيه سواء فى عمليات الهجوم على الكنائس المصريه أو ظهور سيديهات تسئ للأسلامأو ضرب الاماكن السياحيه اللى بدخلنا فلوس زى اللى حصل فى طبا ودهب .دى حاجات لا صله لها بالاسلام ولا تحرض عليها المسيحيه.
مين منا مش فاهم؟!مين منا مش عارف ؟!أن اللى بيحصل ده مترتب من ناس بتفكر وترتب لاهم مسلمين ولا حتى مسيحيين.دول ناس تعرف حاجه واحده أمتلاك العالم .طبعا مش محتج أنى أقول هما مين ...هما اللى قسموا السودان زدخلوا العراق وأديهم فى فلسطينوبيفكروا فى سوريا؟
ممكن تسألى صحبتك (ش)هى بتسمع مثلا (blue)طب مهما دول مسيحين وممكن يبقوا يهود كمان ليه بقى بتسمعهم؟!!.
مجرد الموافقه على حدوث مثل هذه الحوادث مشاركه فيها وحيدفع ثمانها من ناس لا يهمهم دول ولا دول

 
At 5:26 AM, Blogger change destiny said...

شخمششخم : بقالي كذا يوم عايزة أرد على تعليقك و مش عارفة ز واقع سخيف مش عايزة أتقبله و مش ناوية أقلده


delpiero : الغرب مش عدونا الأول و الوحيد . احنا بنعادي نفسنا و بناكل في بعض و بنضعف نفسنا و بعدين نلومهم . الغرب مش حاطط في دماغه غير الاستفادة من اللي عندنا و السيطرة علينا . بس هو مش كره لله في لله

 
At 11:08 PM, Blogger Abdul Rahman Hilmi said...

السلام عليكم
لست مصريً و لا أعلم في أحوال المجتمع المصري ولكن عندي تعليق صغير.

أولً أنا طبعن ضد الجريمة التي حصلت ولكن أيضً أحدُنا لا يقول ما قلتيه في المقال.

المسلمون إخوتك مهما حصل و مهما كان. صحيح أن بعض المسلمون أخطئوا بحق دينهم و لكن الرد على هذا هو كما قال الرسول الكريم, أن نصلحهم و لا نحقد عليهم فهم في النهاية مسلمون مؤمنون من أتباع الرسول المصطفاى.
الله يهدي الجميع يا أختي. الفرج أتٍ.

شيء أخر أريد التعليق عليه هو عن قولك أن في الدنيا بيننا القضاة و في الأخرة الله. هذا كلام لا يقال. نحكم نحن بما أنزل الله علينا في الدنيا و في الأخرة الله يحكم علينا بما حكمنا.

وَأَنِ احْكُم بَيْنَهُم بِمَآ أَنزَلَ اللّهُ وَلاَ تَتَّبِعْ أَهْوَاءهُمْ وَاحْذَرْهُمْ أَن يَفْتِنُوكَ عَن بَعْضِ مَا أَنزَلَ اللّهُ إِلَيْكَ فَإِن تَوَلَّوْاْ فَاعْلَمْ أَنَّمَا يُرِيدُ اللّهُ أَن يُصِيبَهُم بِبَعْضِ ذُنُوبِهِمْ وَإِنَّ كَثِيرًا مِّنَ النَّاسِ لَفَاسِقُونَ
5:49

السلام عليكم و رحمة الله

 
At 2:34 PM, Blogger sha3'af said...

المشكلة مش في اننا نادرين او حالة شاذة زي ما بتقولوا ، المشكلة ان احنا نادرا ما بيبقى لنا صوت

اللي حوالينا مقولبين

واحنا متشذرين
فما بنقدرش نبقى أقوى

معاكي يا
change distiny
في كل اللي قلتيه

 
At 11:21 PM, Blogger change destiny said...

abdul rahman hilmi : بيتهيألي ديننا أمرنا بالطاعة لولي الأمر

sha3'af : علي صوتك و ولا يهمك بكرة باقي الأصوات تعلى مع صوتك

 
At 2:15 AM, Blogger KingOfHeart said...

انا عارف ان الرد متأخر جدااا
الامر بجد محزن,انا تعليقي على حاجه واحده زعلتني يوم الحادث..انتوا عرفين ان الكنيسه اللي حصل فيها الاحداث ادامها ع الجهه المقابله جامع من اكبر جوامع المنطقه....انا ساكن قريب جدااا لدرجة اني سمعت المسايحه المتظاهرين بيصفروا و يسقفوا ساعة اذان العشاء,انا فاهم انهم مجروحين و حاسيين انهم مظلومين يس اللي حصل ده عيب جدااا,عيب؟ هو بقى في حد يعرف العيب دلوقتي؟؟انا شكلي عايش في مدينةافلاطون الفاضله و اللا ايه؟؟؟؟ وزي ما قال زبادي اسكندريه طول عمرها عايشه مع الخواجات و عمرنا محسينا بفرق و المعامله ,شمعنى دلوقتي؟؟؟ سؤال نفسه يتجاوب؟

 
At 10:15 PM, Blogger Osaid Rasheed said...

مرحبا
افكار و معان جميله جدا
للاسف كل اللي بيحصل سببه الجهل وعدم الدراية وقلة الوعي
انا احاول قراءة مدونتك من حوالي اكثر من نصف ساعو وسارجع الليلة للقراءة مرة اخرى
كل التحية والاحترام
اسيد ، مدينة الخليل ، فلسطين

 
At 11:25 AM, Anonymous Anonymous said...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品
情趣用品,情趣用品,情趣用品,情趣用品.情趣,情趣,情趣,情趣.
視訊聊天室

情色,AV女優,UT聊天室,聊天室,A片,視訊聊天室


UT聊天室,視訊聊天室,辣妹視訊,視訊辣妹,情色視訊,視訊,080視訊聊天室,視訊交友90739,美女視訊,視訊美女,免費視訊聊天室,免費視訊聊天,免費視訊,視訊聊天室,視訊聊天,視訊交友網,視訊交友,情人視訊網,成人視訊,哈啦聊天室,UT聊天室,豆豆聊天室,
聊天室,聊天,色情聊天室,色情,尋夢園聊天室,聊天室尋夢園,080聊天室,080苗栗人聊天室,柔情聊天網,小高聊天室,上班族聊天室,080中部人聊天室,中部人聊天室,成人聊天室,成人

 

Post a Comment

<< Home

-->