Chains of hope ....
احساس جميل قوي انك تحس انك السبب في ابتسامة . وش ينور و عيون عطشانة ترتوي بيك فرح و قدامك . تحس ساعتها انك طاير في السما
عشان كدة طول عمري كنت بهتم قوي بهدايا أعياد ميلاد صحابي . رحلة بحث مضنية في أشهر معينة من السنة عشان تلاقي الهدية الصح . الهدية اللي تبقى عارف انها بجد هتسعد شخص . تحسسه انك مهتم بيه انك فكرت فيه انك فاهم شخصيته و مقدر مشاعره و عارف هو حيستفيد بإيه و هو نفسه في إيه . تفكير و لف و تدوير و كل دة
لمجرد لحظة تسمع فيها ضحكة من قلب صديقك
مش عارفة ليه في ناس بتستتفه أعياد الميلاد مع ان الواحد فينا مش بيبقى قدامه فرص كتيرة عشان يبين مشاعره . دي مرة في السنة
لكن مش دة اللي أنا عايزة أكلمكم فيه انهاردة . أنا عايزة أكلمكم عن هدية برضه. بس هدية من نوع تاني
هدية مني لمين؟ مش عارفة . و ممكن أكون بحبها عشان مش عارفة
بحس ان الواحد سعات لما بيحب جماد قوي سواء كان سلسلة أو دبدوب أو قلم أو أيا كان ان الجماد دة بيكتسب جزء من الحب دة . بياخد حتة من روحي
عشان كدة من حين لآخر باخد حاجة من اللي أنا بحبهم قوي و أعملها علبة هدايا شيك و أحط معاها كارت سعات بكتب فيه قصة الحاجة دي معايا و سعات الكلام اللي أنا بقوله دلوقتي وسعات نصيحة و أسيبها عالبحر بين الصخور . و مع اني الحاجة دي عادة ما بتكون غالية علية قوي لكن بحس براحة بعد ما بهديها
معرفش مين ممكن يلاقيها , واحد واقف يشرب سجارة عالشط يلاقيها و يفهم معانيها , ولا واحدة محتجالها أو محتاجة لفلوس تبيعها و يا ترى حتبيعها لمين , ولا عيل يلعب بيها أو يحدفها في الموج و تبقى هدية مني للموج . مليون احتمال و أنا مش عايزة أعرف . كفاية ان اللي لقاها اتبسم
سلسلة أمل و بتربط البشر ببعض . شوف المكتب اللي انت قاعد عليه دلوقتي قعد عليه كان قبلك . مين ضحك عليه؟ و مين بكى عليه ؟ مين ساب فيه حتة من روحه؟ و مين لسة حيقعد عليه ؟ ابنك ؟ ولا حد لسة حتتعرف عليه ؟ ولا حد عمرك ما حتعرفه ؟ كام ذكرى و كام فكرة و كام احساس
مني اليك ... أيوة اليك
من روح لروح ...
ومنين تروح ...
تشفي الآهات ...
ينسوا اللي فات ...
و هي عايشة بذكريات ...
قدامها ضحكت الشفايف ...
و القلب شايف ...
فرح العيون ...
و ازاي يكون ...
الحزن أكبر من الجنون ...
حسبت عمري بالثواني ...
و هي حسبت بالأغاني ..
لكن و رغم عشقي لها ..
مكتوبلها ..
غيري تلاقي ...
و يبقى باقي ...
حبها ...
مني ...
و منك لمسة اديك ...
أصلها ...
مني لعنيك ...
posted by change destiny @ 4:50 AM
36 Comments:
بصراحة انتي كل يوم بتكتبي حجات بتمسني بجد بالنسبة لسوالك ليه الناس بتستخف باعياد اميلاد علشان مفيش حد بيحمل عيد الميلاد كل المشاعر التي تحدثتي عنها فمن يستخفون باعياد الميلاد يحسون بانه هم ثقيل وليس فرصة للتعبير عن اهتمام بسعادة وفرح صديق
اوقات بيعدى عيد ميلادى وانا محبط او فيه مشكله...لو حد بيعمل زيك اعتقد انى ح احس انى ح ابدأ سنه جديده وحاسس ناس بتفكر فيا وحاسه بيا وانى مش وحدى عشان فى يوم كان بيننا صداقه...اخويه او حب...جميل اوى لما احس بكل حاجه حواليا لو حتى كانت جماد واعيش معاها مسيرها بتحكى عن وجودى حتى لو ماحدش يعرفنى..زى ما قولتى بالظبط....
وتقريبا ممكن اكون لقيت حاجه من حاجاتك وانا واقف ع الشط بس بعد ما بطلت سجاير..حكايه مش وقتها
مهندس مصري : الصبح لما دخلت عالنت مكنتش متوقعة اني ألاقي حد علق . و اتبسط قوي لما لقيت تعليقك بس ملحقتش أرد عشان كان عندي امتحان
مبسوطة انك موجود و اني مسيتك
i just need some space :
هيييييييييييييييه هيييييييييييييييه . أول تعليق ليكي كمدونة عندي . مبروك علية . و لأ لو كان عيد ميلاد حد الشهر دة كنت فكرتك متقلقيش
Mr lonely : كل سنة و انت طيب
كل سنة و انت من الأحبة قريب
كل سنة و القمر واخدك في حضنه
كل سنة و الزمن بيداري عنك حزنه
كل سنة و انت عند الليل غالي
كل سنة و انت طايل كل عالي
كل سنة و انت لسة بريء
كل سنة و ليك مليون صديق
كل سنة و انت حابب بالأمان
كل سنة و النيل بيسقيك حنان
كل سنة و انت قلبك حر
كل سنة و الدمع على عيونك ما يمر
كل سنة و صوتك مسموع
كل سنة و الفرحة ساكنة الضلوع
كل سنة و انت بتسامح و ترحم
كل سنة و من كل الشرور تسلم
كل سنة و غير الحلو ما تشوف
كل سنة و انت بعيد عن الخوف
كل سنة و الخير في عينك يترسم
كل سنة و انت بتعرف تبتسم
أفتكر ان سنين عمرك عشرين و دول عشرين أمنية لكل سنة , انما قولي لقيت ايه ؟
علي فكرة انا مبسوط برده اني كنت ولو سبب صغير في اسعادك وعني سؤال مهم عماتي ايه في الامتحان وفي جامعة ايه
اعياد المختلفة صديقتى العزيزة تختلف من انسان الى انسان فية ناس تهتم بيها وفية ناس لاتهتم والاسباب مختلفة ممكن تكون اقتصادية اجتماعية تعود منذ الصغر
اتذكر فى حوار لعبد الوهاب قال فية اعتبر ان اللى بيحتفل بعيد ميلادة مجنون دى سنة عدت من العمر مش راجعة احتفل بيها ازى
من راى انها مسألة تعود واختلاف اهتمام..
اشكرك على البوست الرائع
ربنا يوفقك
الى الامام
مهندس مصري : امتحانات ايه بس احم احم صلي عالنبي . أنا في هندسة اسكندرية بس انتساب هههه
تامر : عبد الوهاب معاه حق بس أنا مش بتكلم على احتفال الواحد بنفسه أنا بتكلم على احتفاله بغيره
ابراهيم : يا سيدي انت تؤمر . عايز هدية بقة ولا عايز حقك ناشف؟
و بصراحة مش محتاجين يقروا حاجة أنا كتباها عشان يقولوا اني سايكو .أنا كل اللي بيشوفني بيقول علية سايكو
أحمد فوزي : معايا بس مش حدهملك لغاية متقولي . أنهو سيما دي اللي بتلاتة جنيه
sph1nx : عود حميد يا باشا ... فينك؟
الا ايه هو رأيك في أعياد الميلاد
أنا من أنصار أن الهدية مالهاش مواعيد وأجمل الهدايا اللي بتكون مفجأة وغير متوقعة إلا هدية عيد الميلاد لأن المناسبة شخصية قوي ولها خصوصية شخصية لأنها تربط بي وحدي .. وأنا لا أنسي من زارني في يوم مولدي ليقول لي كل سنة وأنت طيب أو من يزورني حين أكون مريض
واتفق معك في أن الاشياء التي نستخدمه بيكون فيها حتة مننا
مدونة جميلة و موضوعها أد أية جميل والأجمل ردك علي Mr lonely
..................
كل سنة و انت عند الليل غالي
كل سنة و انت طايل كل عالي
..................
كل سنة و انت بتسامح و ترحم
كل سنة و من كل الشرور تسلم
كل سنة و غير الحلو ما تشوف
كل سنة و انت بعيد عن الخوف
كل سنة و الخير في عينك يترسم
كل سنة و انت بتعرف تبتسم
تسلم أيدك
معتقدش ان عيد ميلادي بفرح بيه بالعكس ببقي زعلان اهي سنة بتنقص من عمر الواحد
اما للجزء التاني فاكيد عادة جمياة اول مرة اسمع عنها
(وانا اقول ايه الهدايا اللي بلاقيها كل شوية دي )
ممممممممممم
طيب
well .... absolutely you know how to give some hope :)
god bless you for such a talented writing :P ....
I know since i'm a guy i should not say that ...but hmm that was sweet :P
انتي يا بنتي مش ناوية تتجوزيني بقى ؟
مدونة رائعة.......أهنئك يا باشمهندسة
:-)
إحم إحم
ممكن أكتب عنوان بيتنا وبدل ما ترمى الهدية بين الصخور تحدفهالى فى البلكونة؟
:D
تصدقى أعياد الميلا أنا مش بهتم بيها خااااالص ممكن لو افتكرت عيد ميلاد حد من صحابى ومش اى حد كمان اتصل بيه واقوله كل سنة وانت طيب ده لو افتكرت اصلا
أما بالنسبة لعيد ميلادى والله العظيم بيعدى يوم عادى وساعات مش بفتكره اصلا، يعنى انا عيد ميلادى 20/6 باجى يوم 21 او 22 وساعات 23 والله أقول ايه ده هو يوم 20 عدى يبقى انا كدة تمت كذا
غيبوبة أنا
:D
جميل البوست وما تنسيش طريق البلكونة الله يخليكى
ايه الرقة دي يا بخت صحابك بيكي
ممكن اكون صحبتك
;)عيد ميلادي 29-5
علي فكرة انا باعتلك من زمان انتي وزبادي دعوات ع البلوج
ما جيتوش ليه لحددلوقتي
زبادي : الله يسلمك . و عشان كدة بحب الهدية التانية أكتر عشان بتبقى مفاجأة
هوميروس : أنا برضه مبحبش يوم عيد ميلادي . بس مش عشان سنة عدت لأن عمري كدة كدة ربنا كاتبله آخر . و كوني بقرب للنهاية سنة دة أمر محتوم . ( و أنا بقول مين اللي بيمشي ورايا كل ما ببقى رايحة أهدي واحدة )
sph1nx : عقبالنا كلنا لما نطلع من الكليات الهم دي و ندخل فشغل غم و نتحسر على أيام الكلية ... تصدق فعلا ما توقعتش أن يكون دة رأيك مع ان بشخصيتك أكيد دة رأيك و الى حد ما معاك حق
adamelmasry : :) طيب
sasha : i'm glad somebody does the same . i'm sure your friends apreciate it
gray fox : *blushs* well i think guys should say sweet more often
anonymous : ههههههه
ayman_elgendy : مدونتك أجمل و شكرا
أحمد فوزي : ماشي يا عم حسيبهملك على شباك التذاكر
السويدي : قولي انت بس عايز ايه و أنا احدفوا في البلكونة
دنيتي : ان شاء الله تكون صداقة مدى طويل
adamelmasry : موصلنيش منك دعوات خالص
هلا عزيزتى
وين البوست الجديد
فى انتظارك
ربنا يوفقك
الى الامام
فعلأ ساشا كدة لأزم الهدية اللي تجبها تكون
unique and very special
you seem you also have this part
sa3at el ayam betnasina 7agat a3'al men el fe2dina .... 7agat basita 7agat 3abita :)
yaret nefatesh 3aliha gowana mansebhash temout aw tetouh ...imken tekoun de7ka aw so2al imken tekoun warda aw kelama balash ne7'aly el donya te3'alwesh 3aliha
antika
يا ستى اى حاجة منك حلوة بس انت احدفى ومالكيش دعوة
tamer : ول ما أخلص الشيتات اللي عليا هكتب ان شاء الله
sabrina : ربنا يخليكم لبعض
karakib : عات الواحد بيبقى مكتوبله يتوه و يضيع الضحكة عشان يلاقيها في حتة تانية . منور المدونة
m-elsewedy : بس كدة . دة انت تؤمر
apprivoiser
هي دي الكلمه اللي بتعبر عن اللي انت بتقوليه 000 اننا ندي روح لجماد لما نحبه الكلمه دي باللغه الفرنسيه 000 لم اجد ابدا في لغه اخري كلمه تعني نفس المعني او تصف هذا الاحساس 000 فعلا حاجه حلوه اوي ان الواحد يحس بكده انه يشوف حاجه و يبتسم لانه افتكر بيها حد غالي عليه او يقعد في مكان و يفتكر 000 و يكون مبسوط لانه اصبغ علي المكان روح 000 هو وحده حاسس بيها و الاجمل انه يشارك الناس باحساسه ده
جميل اوي
انتوك
بقولك ايه ما تقوليلي بتسيبي الحاحات دي فين اهي تنفع في الزنقة
لا بجد احساس مرهف وعالي جدا ورقة متوقعة من صاحبتها
ايه اخبارك شكرا علي السوال بس انا كنت تعبان شويه كان عندي اكتئاب وحالتي وحشة بس عدت والحمد لله
بعد ماإتجوزت وعند اول مناسبة في عيلة مراتي وبعد ماحبت الهدية .. قالت ماتبقاش تعمل كده تاني .. احنا عندنا بندي فلوس وهما هايردوها لينا فلوس في مناسبتنا
متاخر بس معلش
أيوة اليكمن روح لروح ...ومنين تروح ...تشفي الآهات ...ينسوا اللي فات ...و هي عايشة بذكريات ...قدامها ضحكت الشفايف ...و القلب شايف ...فرح العيون ...و ازاي يكون ...الحزن أكبر من الجنون
جامدين جدا جدا جدا جدا
بالنسبة لموضوع اعياد الميلاد اذا كان على انا بفتكر للناس اللى اعرف اعياد ميلادهم بس فيه ناس بتاخد الموضوع بسخرية يعنى كله حسب دماغه
بالمناسبة انا عيد ميلادى قرب وبحب العربيات فلو حتة بى ام سابعة موديل 1999 يبقى احلى واجب
هههههههههههههه
انتى اللى قلتى
تكون ببنزين (لا ريموت ولا سلك ولا حتى زق) هههههههههههه
انتوك : شكرا على المعلومة . أنا مش بحب الفرنساوي قوي بس شكلي ححب منه كلمات معينة
عشقك ندى : رقة متوقعة من صاحبتها ... هههه . أنا كل اللي يعرفني يعرف ان معنديش دم . بس أرجع و أقول مشكلة تانية من مشاكل مجتمعنا انه بيعتبر ان البنت لازم تبقى ضعيفة و ملهاش شخصية لأن دة طبع الأنثى ... أقول ايه حسبي الله و نعم الوكيل
مهندس مصري : ألف سلامة عليك من الاكتئاب ... بس ما دام عدت .. ما تقولي ايه العلاج
ahmed shokeir : حمد الله على السلامة . هيه هيه . ايه يا عم الغيبة الطويلة دي .
أما عن عيلة مراتك فتفكير منطقي برده بس لما متبقاش عارف البني ادم كويس
taher : احم احم ... انت غاوي تحرجني ... بس ربنا يديني و أجيبهالك يا سيدي
الله يسلمك الحل بسيط قاعدة في نيل كروز وشرب واحدموكا علي انغام عمرخيرت ومنير
بتتسرسب من بين أيديا .. سنين صبايا
وحاجات كتير مستني أشوفها .. بقت ورايا
على فكرة دة مش كلامي بس أنا حاسة بيه
شكراعلى النصيحة لكن متهيألي القاعدة عالبحر بقت تزودني هم . لو مش فاهم اللينك دة هيفهمك
http://looneynada.blogspot.com/2005/11/blog-post.html
مشاعر جميله وأحاسيس طاغيه جميل أكتر انك قادره تجمعى مشاعرك وتفكيرك فى أن واحد
أه من شاطئ كليوبترا واللى عامله فى هدايا الناس بس جميل أنك بتسيبيها لحد ممكن يحتجها وممكن يبقى العكس بس المهم فى النيه
DELPIEROO
delpiero : النية صافية و الحمد لله
انا اسف انى اتأخرت اوى فى ردى دا..لانى بجد ماكنتش قريت ردك...واشكرك اوى على شعرك الجامد دا يا جامد...ومش عارف احد الساده المحترمين بيقولك شاطىء كليوباترا..انا دايما هناك...واللى لقيته كان مركب مكتوب عليها شعر لاحمد فؤاد نجم..فى شطنه هدايا ومعاه قطه بتحضن قلب..وبس رجعتها مكانها والله
شكل الواحد كده شكله حيرجع يمشى على البحر تانى:)
بصى حاولى ترمى منبه يمكن مصر تلاقيه وتفوق,وكمان خرزة زرقا عشان إسكندريتناالجميلة واللى حصلها
إحساس سعادة الآخرين أنبل شىء فى الدنيا,لما تشوف غيرك فرحان ده بيفرحك اكتر من فرحتك لنفسك..بس لازم يكون قلبك صافى عشان تحس بكده
يا رب كلنا نفرح لبعض مع بعض,ونبطل الجوانيات السودا:)
mr lonely : طب كنت خدها و ادهالي ... هههه
aolaaol : بيتهيألي مصر مش عايزة منبه دي محتاجة قنبلة عشان تفوق
و ان شاء الله نفرح بيها
sha3'af : يعني انتي من أنصار النوع التاني من الهدايا
منورة المدونة و آسفة على التأخر في الرد
اريد ان اعرف خض برج التور في الزواج والشغل
Post a Comment
<< Home