لحمة يا دنيا لحمة
بجنيه و نص
قرب و بص
قرب يا باشا .. أؤمر يا بيه
كيلو اللحمة بقى بجنيه
و دة لحم بقر و لا حمير ؟
دة لحم بشر و الخير كتير
جرب و دوق
مص العروق
فشفش عضامهم
و اشرب دماهم
و دوس على جراحهم و سوق
قولي بقى عايز بكام ؟
طب قولي قبلة مش حرام ؟
لا هو انت فاكره لحم ميت مش قتيل ؟
دة لحم طازة مدبوح جديد ملوش مثيل
جديد قديم تفرق في ايه
هو احنا لاقيين البديل
و ما دام حلال
لازم أفرح العيال
اقطعلي و اوزن راس جمال
يا عم روح دة من المحال
هو انت فاكره مننا
أمال بتدبح بس مين ؟
الفلاحين الغلبانين
المحتاجين الشقيانين
الله أعلم يا جدع
ابنك أخوك
أختك أبوك
أو حتى انت لو معكش ندبحوك
و مش كفاية كدة زحام
سيبناكم تكلوا في بعضكم
و تسرقوا و تنهبوا
و كسبنا كام مليون كمان
حلو الكلام؟
كل الكلام ميكفينيش
لازم يموت الخوف عشان نقدر نعيش
لازم أقف و أقول و أعلي الصوت و أغني
و غصب عنهم و قصد مني
غنايا يتحول عويل
يفتح سبيل
للحق يصحى من الممات
و يحول الظلم لسكات
و ان كان طريق صعب و طويل
مش مستحيل
نمشيه سوا
و بكرة يوصل منا جيل
posted by change destiny @ 4:22 AM
33 Comments:
ده نتاج للطغيان والراسمالية الحقيرة
جميل اوى يا ندى تسلم دماغك اللى ألفت
:D
بس هو ماقالكيش رأس جمال بكام؟؟؟
8-)
نسيت صحيح
أخبار الإمتحانات ايه؟؟؟
يارب تكون كويسة ان شاء الله
عزيزتي:
جزار غشيم اللي بتتكلمي عنه
لأن الدبايح هزلانه
لو كان مفتح
كان سمنها قبل الدبح
كان وضب لها الزريبة
وقدم لها العليق
وطببها ودللها
لكن الجلد التصق بالعظم المنخور
يعني اللي هيطول ماصورة من عظم أخيه
مش هيلاقي فيها ولا حتى شفطة نخاع
وبلاش كدا عشان كدا عيب
واحنا في عصر العولمة والرفاهية والمشاريع العملاقة وحماية الرقعة الزراعية والمدن الجديدة
وبعدين إيه يعني ناس على الحديدة
أكيد متكيفين بالحديدة
هم يعني اللي عاوزين كدا كانوا عاوزين كدا؟
أبدًا...................
وبلاش اللعب بالسكاكين
:
حبيها على قد ما تقدري
أنا باحبها حتى لو تراب
واسمحولي
العيب مش من فوق يا جماعة
العيب يبدأ من أولى روضة لكل الأدراج المفتوحة لكل اللي مستني حد يغيرله الدنيا وينسف الشمس ويجيب شمس جديدة وهو نايم على ودانه
لو بيحبوها كانوا حافظوا على عرضها
وكفاية كدا
:
تحياتي
عالي صوتك...
عالي بالغنى...
لسه الأغاني ممكنة ممكنة...
ملعون ابو الظلم
يا ريتهم بيدبحوا علشان احنا ناكل
داحنا ندبحلهم وياكل غيرنا
كلنا سبب فى كده
؟
حلوة دي
والله ده كلام جميل
بس لزم نعلى صوتنا
هى الدنيا دى ايه
الى بيتكلم فى الحق
يخش المعتقل
والى يمشى مع الظلم
يبقا ماشى فى حله
الكلم ده مع الحكومه
دى حاجه ممله اوى
بس والله الله ينور عليكى
انت بتحسى بجد
مش مجرد كلام
جميل قوي
حلوووة
جامده التنين
غريب
الناس جياع مع إن الأكل وفير
الناس هزال مع إن اللحم كثير
شو السبب
؟؟؟؟؟
تسلمى
ربنا ياخد الظلمه يارب
بسم الله ماشاء الله
ايه الحلاوة دى
أنا قولت نجم ألف القصيدة دى أمتى
روحى يا شيخه ربنا يكرمك
رغم طول الطريق وصعوبته
لا مش مستحيل نمشيه سوا
وسيصل جيل وأكثر
طالما هناك شباب يتحلون بالوعي
وهناك بصيص أمل
بداخلي رفض واضح للسوداوية والاكتئاب
وأحاول دوما رغم الصعاب أن أبتسم
ولفت نظري يا ندى أنك تفعلين ذلك
حاولي تفضلي كده على طول
ايه الجمال ده روعة
بس علي فغكرة ده مش افترا من الجزار قد ما هو غباء من البهايم اللي مسلمة نفسها (مع الاعتذار للي بيفهموا واندبحوا في الهوجة)يا رب ارحمنا من غشم الجزار وتخلف البهايم
realy its very good however there is some mistaken rythem but really its honest and touched, the image of selling human flesh was alwayes as shocking as the naked truth
even in holly qura'n the ayah of eating ur brother flesh and shakespear the merchant of vience
its very expressive thanks
im waiting for more
أول مره ازورك بس انشاء الله هاجى علطول
رائعة بجد فكل من نصحته بقراتها ابدي اعجابه فبعد ان قرات ما كتبتي كتبت هذا:
تساقط الدمع من عيناها كالماس
تساقط من جسد يفيض بالاحساس
فانا معها انسي كل الناس
فيا ايتها النفس الجميلة كوني فينا جميعا
ما كل هذه المعاني طيبة صفاء نقاء
فكل هذا هراء
فهناك بداخلك اشياء
تتلاءلا مثل النجوم في الفضاء
فانا لست بشاعر
ولا بشخص يجيجد التعبير
ولكن كل ما اعرفه اني معك احس بالتغير
فاصبحت اتمني الموت لو لم اراها
حقا ولاول مرة اتمني الموت لو لم اراها
فهل ساراها ام ساري الموت
بصراحة ياندى
من اقوى مادونت واضح إن الحالة كانت عالية جدا وإنتي بتكتبي . وانا بقراها كنت مستني ألاقي تحت إسم شاعر كبير
وأرجع أقول تاني من أحسن مادونتي
ازيك يا غير مصيرك...و اللهي وحشاني يا بنتي...كنت فاكرك رسامة شاطرة و بس اتاريكي ثورجية درجة اولي...برافو
كلام جميل جدا
:)
كل اللى اقدر اقولة
ادى حال البلد عايزة ولد يكون جدع
يمكن يقدر يشيل الوجع
تحياتى
i hope 2 see u on my blog
ايه الدماغ العالية دى
صباح قوة الموهبة
و القدرة على التعبير
بجد الله ينور
و شكلى هبقى زبون
duke : دة نتاج سكوتنا عليهم
m elsewedy : السعر موحد جنيه للكيلو
و مفضلش غير امتحان واحد يوم التلات الجي
هييييه هيييييييه
مأمون المغازي : ازاي تطالب اللي تحت انهم يحافظوا عليها وهما جهلة و جعانين و مش فاهمين أي حاجة
the eyewitness : نير دة أسطورة
karakib : و مامته و اخواته و ولاده و اللي يتشددله هه
taher : و لسة بندبح
adamelmasry : أهو انت اللي حلو
ابن الشارع : الساكت عن الحق شيطان أخرس
bosbos : من بعض ما عندكم
aolaaol : دموية
النوبي : و كاس العالم و بيكهام و رونالدينو
littelemo : بصراحة مش فاهمة دة سلبي ولا ايجابي
ayyhm jzzan : ضعفنا هو السبب
metkazy : ربنا كبير
shady : ربنا يخليك ... أنا فين و نجم فين
film69 : مستحيل عدم الوصول لحالة احباط لكن من المستحيل برضه عدم الخروج منها بعزيمة أكبر
عشقك ندى : طب هو اللي بيفهموا دول مش لو كانوا بيفهموا مش كانوا عرفوا يوقفوا الهوجة
ahmed hassan : thanks for passing .. i know it's got lots of mistakes but it's a begining . hope i get better one day .
عوليس : تنور و تشرف و تآنس
مهندس مصري : خيالك وصف خيال و وصفه باتقان لكن بعد الشر عليك من الموت
ahmed shokeir : بصراحة أول مرة قريت التعليق ادايقت . لكن بعد ما قريته تاني يوم اتبسط
ka3'eem : eh ya basha ? fenak ? 3aml eh ? b2alk moda msh bayn
balqees : بيتهيألي كان حالة غضب من الأوضاع
abdou basha : بيتهيألي انه دموي أكتر ما هو جميل
sherif 3'areeb : بس ولادها بيتفارجوا على كاس العالم و مش فاضيين . منور
hesham : يا فندم انت تشرف و من المرة الجاية حعملك تخفيض
خرام عليكي مش كفاية الامتحانات بتفكريني ليه بدول كمان
كل الكلام ميكفينيش.. لازم يموت الخوف عشان نقدر نعيش
اه يابنتى اه
تسلم ايدك اللى كتبت ودماغك اللى فكرت
ربنا معاكى فى الاجزامات
هوميروس : عشان متنساش
lasto adry : elexams 5elst w el7amdolellah mnawara sada2eeny
السلام عليكم يا ناااس الظاهر اني جيت متأخر
الدنيا بقت فعلا كلها جزارين بتخصصات مختلفه عندك مثلا جزارين عقول بيموتوا فى لحمة الراس النضيفه بعد ما بيغسلوها غسل سواء فى الكليات او المدارس او التليفزيون او...او..
وعندك جزارين قلوب بيموتوا فى تقطيع القلوب ورميها فى الشارع للكلاب وعندك جزارين لكل الاعضاء يضحكوا عليك ويشتروا منك الحته بخمسه جنيه وكل دا عشان عشوه ولا غديوه لاجل العيال وانت ياوالداه مضطر
بس والله ح ييجى اليوم ياما يكون نهايتنا ونموت بشرف يا ح ننتصر ونعيش برضه بشرف
gamda
Excellent, love it! » »
Post a Comment
<< Home